अदालतले ३ महिना कैद र ५० हजार जरिवाना तोके पनि वडाध्यक्ष भरतबहादुर अधिकारी सार्वजनिक पद धारण गरेको व्यक्ति भएकोले थप ५० प्रतिशत सजाय भएको हो ।

पोखरा, ७ मंसिर । पोखरा महानगरपालिका वडा नं. २४ का वडाध्यक्ष भरतबहादुर अधिकारीलाई जातीय भेदभाव तथा छुवाछुत सम्बन्धी कसुरमा जिल्ला अदालत कास्कीले साढे ४ महिना कैद र ७५ हजार रुपैयाँ जरिवानाको फैसला गरेको छ ।

पोखरा–२४ का वडाध्यक्ष भरतबहादुर अधिकारी

जातीय तथा अन्य सामाजिक छुवाछूत र भेदभावसम्बन्धी (कसूर र सजाय) ऐन, २०६८ बमोजिम न्यायाधीश अवनी मैनाली भट्टराईको एकल इजलासले वडाध्यक्ष अधिकारीलाई ४ महिना कैद र पीडितलाई १० हजार रुपैयाँको क्षतिपूर्ति भराउन आदेश दिएको हो ।

सोही वडाकी सदस्य मैया नेपालीले आफूलाई वडाध्यक्ष अधिकारीले जातीय भेदभाव र छुवाछुत गरेको भन्दैं जिल्ला प्रहरी कार्यालय कास्कीमा २०७९ पुस २४ मा जाहेरी दर्ता गराएकी थिइन् । कास्की प्रहरीले अनुसन्धान पश्चात् २०७९ माघ ५ गते कास्की अदालतमा मुद्दा दायर गरेको थियो । अधिकारी पुस २६ मा पक्राउ परेर माघ ९ मा एक लाख ५० हजार रुपैयाँ धरौटीमा छुटेका थिए ।

अदालतले ३ महिना कैद र ५० हजार जरिवाना तोके पनि अधिकारी सार्वजनिक पद धारण गरेको व्यक्ति भएकोले थप ५० प्रतिशत सजाय भएको हो । पोखरा–२४ का वडाध्यक्ष अधिकारी कांग्रेसबाट निर्वाचित भएका हुन् भने बाँकी ४ सदस्य एमालेबाट निर्वाचित भएका हुन् ।

स्रोत: जिल्ला अदालत कास्की