पोखरा, २३ भदौं । पोखरा अन्तर्राष्ट्रिय विमानस्थल सञ्चालन भएको आठ महिनापछि पहिलोपटक बल्ल अन्तर्राष्ट्रिय उडान भरेको छ । भुटानको ड्रुक एयरले व्यावसायिक उडान भरेसँगैं विमानस्थललाई पहिलोपल्ट आम्दानी भएको हो ।

भुटानको पारो विमानस्थलबाट चालक दलका तीन सदस्यसहित शनिबार बिहान ६ः४५ मा पोखरा ओर्लिएको ड्रुक एयरले ४२ अमेरिकी पर्यटक बोकेर ८ः१५ मा थिम्पु फर्किएको विमानस्थल प्रमुख देवचन्द्रलाल कर्णले जानकारी दिए ।

यसअघि चीनको सिचुवान एयरलाइन्सले छेङ्दुबाट चार्टर्ड उडान गरी पोखरा आएको थियो । उक्त विमान फर्किंदा रित्तै फर्किनु परेको थियो । पर्यटन व्यवसायीले विमानस्थलमा ड्रुक एयरका चालक दललाई स्वागत गर्नुका साथैं थिम्पु जाने पर्यटकलाई बिदाइ पनि गरेका छन् ।

भारत, नेपाल र भुटान घुम्ने गरी आएका खर्चालु अमेरिकी पर्यटक ड्रुक एयर चार्टर गरी थिम्पु पुगेका हुन् । जहाज भारतीय एजेन्सीले नै चार्टर गरेको हो । उनीहरू तीन दिन पोखरामा बसेर विभिन्न साहसिक गतिविधिमा सामेल भएका थिए । उक्त टोली शुक्रबार आठवटा हेलिकप्टरमार्फत कुरिनटार पुगेर मर्स्याङ्दी नदीमा र्‍याफ्टिङ गरी हेलिकप्टरमै पोखरा फर्किएको थियो ।