काठमाडौं, २३ फागुन । नेपाल प्रहरीले डेढ करोड रकमसहित हुण्डी कारोबारमा संलग्न दुईजनालाई काठमाडौंबाट पक्राउ गरेको छ । प्रहरीले हुण्डी कारोबारमा संलग्न भएको आरोपमा किर्तिपुर नगरपालिका वडा नं. ३ बस्ने २४ वर्षीय बिक्की खड्गी र भारतको पश्चिम बङ्गाल दार्जलिङ सिलिगुढीमा स्थायी घर भई हाल काठमाडौंह१३, ताहचलमा बस्ने ३२ बर्षीय अमित कुमार अग्रवाललाई पक्राउ गरेको हो ।

प्रहरीले हिजो दिउँसो अमितकुमार अग्रवालको डेरा कोठामा खानतलासी गर्दा नेपाली नगद एककरोड ५० लाख रुपैयाँ फेला पारेको थियो । काठमाडौं–१३ ताहचलमा डेरा गरी काठमाडौंको मख्खनमा विमला इन्टरनेशनल प्रा.लि. सञ्चालिन गरी नक्कली गरगहनाको होलसेल कारोबार गरी बस्ने अग्रवाल लगायतका व्यक्तिहरुले राजश्व छली गैरकानुनी रुपमा हुण्डी मार्फत् वित्तीय कारोबार गर्दै आईरहेको गोप्य सूचनाका आधारमा प्रहरीले निगरानी बढाएको थियो ।

सोही क्रममा ताहचलस्थित अग्रवाल बस्ने घरको गेट अगाडि २४ वर्षीय बिकी खड्गीलाई शंका लागेर सोधपुछ गर्दा उनले कालिमाटीस्थित जीवनदृष्टि बहुउद्देश्यीय सहकारी संस्थाबाट ५० लाख रुपैयाँ ल्याएर अग्रवालको कोठामा पु¥याईदिएको स्वीकारेका थिए । सोही क्रममा प्रहरीले अग्रवालको डेरामा खानतलासी गर्दा डेढ करोड रुपैयाँ, कारोबारमा प्रयोग भएका दुईवटा ल्यापटप र मोवाईल फेला पारेको थियो । पक्राउ परेका दुवैजनालाई अनुसन्धान तथा कारवाहीका लागि राजश्व अनुसन्धान विभाग, हरिहरभवन ललितपुरमा पठाईएको प्रहरीले जानकारी दिएको छ ।