काठमाडौं, २३ फागुन । ‘जब सेन्टर’को नाममा ठगी गर्ने गिरोहका नौंजनालई महानगरीय प्रहरी अपराध महाशशाखाको टोलीले काठमाडौंको विभिन्न स्थानबाट पक्राउ गरेको छ ।

जब सेन्टरहरुले विभिन्न स्थानमा ‘जब प्लेसमेन्ट कम्पनि’हरु दर्ता गर्ने र उक्त कम्पनिहरुले सामाजिक सञ्जाल, पत्रपत्रिका र प्रचारपम्पलेटका माध्यमबाट ‘घरमै बसि जागिर मिल्छ’ भनि प्रचारप्रसार गरी ठगी गर्दै आईरहेका थिए । जागिरका लागि उक्त जब सेन्टरको सम्पर्कमा आउने व्यक्तिहरुलाई फारम भर्ने बहानामा तीनसय रुपैयाँदेखी पाँचसय रुपैयाँसम्म फारम चार्ज तथा एकहजार देखि छ हजारसम्म ‘जब ग्यारेन्टी’ शुल्क लिएर ठगि गरेपछि उनीहरूलाई पक्राउ गरिएको महानगरीय प्रहरी अपराध महाशाखाले जनाएको छ ।

प्रहरी टोलीले काठमाण्डौको कोटेश्वर, नयाँबानेश्वर,चाबहिल र बालाजु लगायतका विभिन्न स्थानबाट उनीहरुलाई पक्राउ गरेको थियो । यसरी पक्राउ पर्नेहरुमा छत्रदेव–६ अर्घाखाँचीका २६ वर्षीय अमर पाण्डे, ३२ वर्षीय तिलकराम पाण्डे र दूधपोखरी–२ लमजुङका २२ वर्षीय आनन्द मरहठ्ठा छन् ।

त्यस्तै, सिरहा–१९ का २३ वर्षीय विवेक यादव, ओखलढुङ्गाको सिद्धिचरण नगरपालिका–३ का २८ वर्षीय अश्विन राई, सिन्धुलीको फिक्कल–२ का २२ वर्षीय घनश्याम पहाडी छन् । साथै चन्द्रपुर नगरपालिका–४ रौतहटका २५ वर्षीया सृजना लामिछाने, विराटनगर–४ की ४० वर्षीया ज्ञानु न्यौपाने र रौतहट जिल्ला मौलापुर–५ का २२ वर्षीय रामबचनकुमार यादव छन् ।

साथै, जागिरको लागि फारम भरेकालाई सर्त बमोजिमको काममा नलगाउने तथा एक जब सेन्टरबाट अर्को जब सेन्टरमा पु¥याएर पुनः शुल्क असुल्ने काम उनीहरूले गरेका प्रहरीले जनाएको छ । यस सम्बन्धमा आवश्यक अनुसन्धान भइरहेको महाशाखाका प्रहरी उपरीक्षक कृष्णप्रसाद कोइरालाले जानकारी दिएका छन् । काठमाडौं उपत्यकाका विभिन्न स्थानमा जागिर लगाई दिने प्रलोभनमा ठगी भईरहेको पाईएकाले रोजगारदाता कम्पनिको पृष्ठभूमि अध्ययन गर्न प्रहरीले आग्रह गरेको छ ।