पोखरा, १७ माघ । अवैधरुपमा लुकाइछिपाइ ल्याएको एक किलो ८ ग्राम सुनसहित पोखराबाट रमेश सुनार पक्राउ परेका छन् । काठमाडौंबाट माइक्रो बसमा पोखरा आउने क्रममा पोखरा–३० पावरहाउसबाट शनिबार राति उनी पक्राउ परेका हुन् ।

अवैधरुपमा सुनको ओसारपसार भइरहेको गोप्य सूचनाको आधारमा जिल्ला प्रहरी कार्यालय कास्की र वडा प्रहरी कार्यालय गगनगौंडाबाट संयुक्त टोली खटिएको थियो । प्रहरीले माइक्रोमा जाँचका क्रममा रमेशको साथबाट चारपाटे बिस्कुट आकारको सुन बरामद गरेको हो । उनको साथबाट विभिन्न बैंकका ३ थान चेकबुकसमेत प्रहरीले बरामद गरेको छ ।

पोखरा–१५ रामबजार बस्ने उनलाई पक्राउ गरी अनुसन्धानका लागि राजस्व अनुसन्धान विभाग हरिहर भवन ललितपुर पठाइएको जिल्ला प्रहरी प्रवक्ता सुन्दर तिवारीले बताए । कास्की प्रहरीले यस अघि पनि तत्कालिन एसपी दानबहादुर कार्कीको पालामा अवैध रुपमा ल्याईएको सुन पक्राउ गरिएको थियो । प्रहरीले गुपचुप राखेको यो घटना विभिन्न सञ्चारमाध्यमहरुमा केही महिना पछि सार्वजनिक भएपछि प्रहरीले यात्रुबाहक बससहित जिल्ला प्रहरी कार्यालय कास्की भित्र सुन ल्याउने व्यक्तिलाई पक्राउ गरे पनि सोही दिन छाडेको खुलेको थियो । पछि प्रहरीले नक्कली सुन भेटिएको भन्दै छाडिएको दावी गरे पनि यो काण्डमा कास्की प्रहरीको भूमिका शंकास्पद देखिएको थियो ।

बेचबिखन गर्ने उद्देश्यले सुन किन्ने व्यक्तिसहित पोखरामा सेटिङ मिलाईएको यस घटना प्रहरीले लामो समयसम्म गुपचुप राखेको थियो । सानो भन्दा सानो घटनामा पनि पत्रकार सम्मेलन गर्ने र युट्युबरलाई साथै बोकेर हिड्ने एसपी कार्कीले गुपचुप राखेको यो घटना भने अझै रहस्यमय नै छ ।