पोखरा । पर्यटकीय नगरी पोखराको लेकसाईडमा एक होटलमा ललाई, फकाई प्रलोभनमा पारी तथा डर त्रास समेत देखाई बाध्य बनाएर यौन शोषण गर्न लगाएको आरोपमा प्रहरीले दुईजनालाई पक्राउ गरेको छ । जिल्ला प्रहरी कार्यालय कास्कीले पोखरा वडा नं. ६ लेकसाईडमा रहेको होटल ड्रिमल्याण्डबाट सुरेश तामा र ऋषि भट्टराईलाई पक्राउ गरेको हो ।

प्रहरीले कार्तिक ७ गते पोखरा–१७ विरौटा बस्ने वर्ष ४२ का सुरेश तामाङ र बारा जिल्ला कोल्बी नगरपालिका वडा नं. १ कोल्बी बस्ने वर्ष २६ का ऋषि भट्टराईलाई मानव बेचबिखन तथा ओसारपसारमा संलग्न भएको अभियोगमा पक्राउ गरेको थियो ।

पक्राउ परेका तामाङ र भट्टराईलाई कास्की जिल्ला अदालतबाट १० दिनको म्याद थप गरी अनुसन्धान अगाडि बढाएको छ भने पीडित महिलालाई मनोपरामर्श गरी आफन्तको जिम्मा लगाएको विज्ञप्तिमा उल्लेख छ ।

पोखरामा बागलुङ बसपार्कमा अड्डा जमाएर बसेका यौनकर्मी महिला र व्यवसायीहरुलाई प्रहरीले महिनौंसम्म धरपकड गर्दै त्यहाँबाट हटाएको थियो । २४ सैं घण्टा प्रहरीले होटल अगाडि गाडीसहित ड्युटी बसेपछि विस्तारै बदनाम हुँदै गएको बागलुङ बसपार्कबाट यौनकर्मी र होटल व्यवसायीहरु पलायन भएका थिए ।

तर, बागलुङ बसपार्कबाट हटे पनि पछिल्लो समय पोखराका आसपासका क्षेत्रमा र विशेष गरी लेकसाईडमा ती यौनकर्मी महिलाहरुले आफ्ना गतिविधिहरु बढाई रहेका छन् । एकातिर कानुनले वर्जित धन्दा सञ्चालनका लागि अनेकन् वाहना र विकल्प खोज्नुपर्ने यौनकर्मी महिलाहरुलाई बाध्यता छ भने अर्कोतर्फ प्रहरीले यस्ता देहव्यापार सञ्चालन गर्ने होटलहरुसँग वार्गेनिङ गर्ने र कुरा नमिल्दा पक्राउ गरेर होटल सञ्चालक र महिलालाई सास्ती पनि दिदैं आईरहेका घटना नौंला भने होइनन् ।

तत्कालिन मुख्यमन्त्री पृथ्वीसुब्बा गुरुङले पोखरा अन्तर्राष्ट्रियस्तरको पर्यटकीय शहर भएकोले यहाँ निश्चित क्षेत्र तोकेर देहव्यापार सञ्चालनका लागि खुला गरिनु पर्ने अभिव्यक्ति सार्वजनिक गरेका थिए । यो अभिव्यक्ति विवादित भएपनि भित्रभित्रै फैलिरहेको देहव्यापारलाई कानुनी दायरामा ल्याएर निश्चित मापदण्डका बिच सञ्चालन गर्ने हो भने एकातिर राज्यले कर उठाउने र अर्कोतिर यसले पोखराको पर्यटन व्यवसायमा फाईदा पुग्ने नै देखिन्छ ।