कैलाली, ३१, असोज । अवैध सम्बन्ध लुकाउन एक श्रीमतीले आफ्नै श्रीमान्को हत्या गरेकी छिन् । कैललीको धनगढीमा आफ्नै श्रीमतीले श्रीमानको हत्या गरेकी हुन् । धनगढी उपमहानगरपालिका–७ का अन्दाजी २५ वर्षीय रमेश चौधरीको घाँटी थिचेर श्रीमतीसहित ४ जनाले हत्या गरेको प्रारम्भिक अनुसन्धानबाट खुलेको जिल्ला प्रहरी कार्यालय कैलालीले जानकारी दिएको छ ।

शुक्रबार साँझ साथीकोमा जान भन्दै घरबाट निस्किएका रमेश शनिबार बिहान एकाएक मृत अवस्थामा फेला परेका थिए । प्रारम्भिक अनुसन्धानका क्रममा घाँटी थिचेर हत्या गरेको भेटिएपछि प्रहरीले श्रीमती अमृता चौधरीसहित चारजनालाई पक्राउ गरिसकेको छ ।

अबैध सम्बन्धका कारण श्रीमतीकै योजनामा श्रीमानको हत्या गरेको बयानका क्रममा खुलेको प्रहरी स्रोतले बतायो । पक्राउ परेका सबै माथि अनुसन्धान भईरहेको प्रहरीले जनाएको छ । मृतक चौधरीका तीन वर्षीय छोरा मात्र छन् ।