टेकराज थामी
काठमाडौं, ६ माघ । घरभित्र दन्किएको आगो छलेर ललितपुर महानगरपालिका– १४ कुसुन्तीका ७० वर्षीय खड्कबहादुर लिम्बू श्रीमती सुष्मासहित मुस्किलले बरन्डामा निस्किए । चिच्याएर गुहार मागे । छिनभरमै छरछिमेक घरअगाडि सडकमा जम्मा भए । भिडमा थिए १९ वर्षीय विप्लव अधिकारी पनि । दुई तलामाथिको बरन्डामा उकुसमुकुस भएका ‘हजुरबा–हजुरआमा’को क्रन्दनले विप्लव थामिन सकेन । सरासर घरभित्र छिरे । आगोको मुस्लो छिचोल्दै वृद्धवृद्धालाई जीवितै उद्धार गरे । तर, दुर्भाग्य १ आफू बाँच्न सकेनन् ।

घटना २३ माघ साँझ ८स्३० बजेको हो । प्रत्यक्षदर्शी विप्लवकी काकी धन भण्डारीले भनिन्, ‘हामी सँगै थियौँ । छिमेकबाट गुहार–गुहार भन्दै चिच्याएको आवाज आयो । हामी सबै घरबाट निस्किएर सडकमा पुग्यौँ । माथि आगो दन्किरहेको रहेछ । बाबु मसँगै थियो । ऊ हत्तपत्त घरभित्र छिर्‍यो । वृद्धवृद्धालाई बाहिर निकाल्यो ।’

विप्लवका बुबा ठाकुर अधिकारी भन्छन्–छोराको मानवता सम्झिएर मन बुझाउँछु

अधिकारी भन्छन्–’छोराको मानवता सम्झिएर मन बुझाउँछु’ : 
उद्धारमा लाग्दा छोरा गुम्यो । छोराको मानवता र साहसी काम सम्झिएर आफ्नो मन बुझाउँछु । तर, शोकमा डुबेको परिवारलाई सम्झाउन सकिरहेको छैन । अरूभन्दा पनि श्रीमती र वृद्ध अवस्थाका आमाबुबालाई सम्झाउन समस्या छ ।

वृद्धवृद्धालाई बचाएपछि उनी आगो नियन्त्रण गर्न भन्दै फेरि घरभित्रै छिरे । काकी धनले अगाडि भनिन्, ‘बाबु घरभित्रै हुँदा ठूलो आवाज आयो । ग्यास सिलिन्डर विस्फोट भएको रहेछ । त्यसैबाट निस्किएको आगोले उसलाई भेटेछ ।’

आगोले ढाड, टाउको, पिँडुला र खुट्टामा भेटेपछि विप्लव बेहोस भएर ढलेका थिए । बाहिर निस्किन नसकेपछि उनको शरीरका विभिन्न अंगमा आगो सल्कियो र गम्भीर घाइते भए । ‘बाबु घोप्टो परेर लडेको अवस्थामा थियो । आगोले शरीरको पछाडिपट्टिको भाग बढी जलेको थियो,’ धनले भनिन् । परिवारले उपचारका लागि अस्पताल लगे पनि विप्लवलाई जोगाउन सकेन । घटनाको सात दिनपछि १ फागुनमा उनको देहान्त भयो ।

आगो लागेको सूचना प्रहरीलाई धनले नै दिएकी थिइन् । सूचना पाएको केहीबेरमै प्रहरी घटनास्थल पुगेको थियो । घाइते विप्लवलाई प्रहरीले नै तत्काल गणेशमान अस्पताल पुर्‍याएको थियो । त्यहाँ उपचार सम्भव नभएपछि थप उपचारका लागि कीर्तिपुरस्थित बर्निङ अस्पताल लगिएको थियो । त्यहीँ उनको मृत्यु भएको हो ।

प्रहरीका अनुसार खड्कबहादुरको घरमा ग्यासचुलो लिक भएर आगलागी सुरु भएको थियो । महानगरीय प्रहरी परिसर ललितपुरका प्रवक्ता एसपी सिद्धिविक्रम शाहले भने, ‘ग्यास लिक भएर आगलागी भएको रहेछ । घरमा दुई वृद्धवृद्धा बस्दै आएका थिए । गुहार मागेपछि विप्लव घरभित्र छिरेछन् । उनले वृद्धवृद्धाको उद्धार गरे । पुनः कोठाभित्र छिर्दा ग्यास सिलिन्डर विस्फोट भयो । आगोको लप्काले उनलाई भेट्यो । सोही कारण उनको मृत्यु भएको देखिन्छ ।’

पुत्र वियोगले विप्लवकी आमा अर्धचेत छिन् । वृद्धवृद्धा हजुरबुबा र हजुरआमाको आँखा ओभाउन सकेको छैन । परिवार शोकमा डुबेको छ । विप्लवका बुबा ठाकुर अधिकारी शोकाकुल परिवारका सदस्यलाई सम्झाउनुपर्ने कठिन मोडमा छन् ।

कुसुन्तीस्थित किरियापुत्री घरमा भेटिएका उनले भने, ‘उद्धारमा लाग्दा छोरा गुम्यो । छोराको मानवता र साहसी काम सम्झिएर आफ्नो मन बुझाउँछु । तर, शोकमा डुबेको परिवारलाई सम्झाउन सकिरहेको छैन । अरूभन्दा पनि श्रीमती र वृद्ध अवस्थाका आमाबुबालाई सम्झाउन समस्या छ ।’

बिएचएम पहिलो वर्षका विद्यार्थी विप्लव सानैदेखि सहयोगी भावनाका थिए । केही वर्षअघि टोलमै रहेको कवाडी कारखानामा पनि आगलागी भएको थियो । त्यतिवेला पनि उनी आगो नियन्त्रणमा अग्रसर भएर खटिएका थिए । त्यतिवेला पनि मजदुरको कुशलतापूर्व उद्धार गरेका थिए । जल्न लागेका सामग्री जोगाएका थिए । त्यो घटना सम्झिँदै ठाकुरले भने, ‘छोरा सहयोगी भवनाको थियो । यसअघि पनि टोलको कवाडी कारखानामा आगलागी भएको कताबाट थाहा पाएछ, उद्धार गर्न गयो । धेरै धनमाल जल्नबाट जोगियो । त्यतिवेला जोगिएको छोरो अहिले बाँच्न सकेन ।’

यसअघि पनि आगलागीबाट जोगाएका थिए मजदुर
बिएचएम पहिलो वर्षका विद्यार्थी विप्लव सानैदेखि सहयोगी भावनाका थिए । केही वर्षअघि टोलमै रहेको कवाडी कारखानामा पनि आगलागी भएको थियो । त्यतिवेला पनि उनी आगो नियन्त्रणमा अग्रसर भएर खटिएका थिए । त्यतिवेला पनि मजदुरको कुशलतापूर्वक उद्धार गरेका थिए । जल्न लागेका सामग्री जोगाएका थिए । -नयाँ पत्रिका